काठमाडौ । भारतको बिहारस्थित गंगा नदीमा डुंगा पल्टिँदा बालबालिकासहित १४ जनाको मृत्यु भएको छ। दुर्घटनामा ६ जना घाइते भएका छन् भने तीन जनालाई सकुशल उद्धार गरिएको छ।
दुर्घटना बुधबार साँझ बिहारको राघोपुर विधानसभा क्षेत्रअन्तर्गत रामपुर श्यामचन्द गाउँनजिक भएको हो।
डुंगामा २५ जनाभन्दा बढी सवार रहेको बताइएको छ। उनीहरू भोज खान जाने क्रममा नदीमा डुंगा पल्टिएको खबरमा उल्लेख छ।
दुर्घटनाको खबर प्राप्त हुनासाथ स्थानीय प्रहरी तथा प्रशासनको टोली घटनास्थलमा पुगेर उद्धार कार्यमा जुटेको थियो।
घटनाप्रति बिहारका मुख्यमन्त्री सम्राट चौधरीले दुःख व्यक्त गरेका छन्। उनले दुर्घटनामा ज्यान गुमाएका व्यक्तिका परिवारलाई प्रतिपरिवार चार लाख भारतीय रुपैयाँका दरले राहत उपलब्ध गराउने घोषणा गरेका छन्।
